‘Di kaya napilitan ka

‘Di kaya napilitan ka
na tapunan ako
ng lasang tubig na “Kumusta?”
nang walang tingin-tingin
dahil hinihigpitan mo
ang strap ng iyong bag
nang minsa’y muntikan na
tayong magkabungguan
sa iisang karaniwang daan?

Nang hingin ng mga hakbang
na salungat nang magsanga,
nag-iwan tayo ng kiming paalam.
At nang likod na lamang natin
ang malayang nagkakatanawan,
daang kilong nadagdagan
ang bigat ng damit
na tangi kong dala-dalahan.